Mir hei lang güebt, wiederhout, u no einisch gsunge u verbesseret- üses Feschtlied "Bärglerfründe" vom Adolf Stähli.
Am letschte Wucheänd si mir auso uf Schüpfheim greiset für am 61. Zentralschwizerische Jodlerfescht üses Beschte z'gäh. Üse Dirigänt kennt üs afe guet gnue, für das är üs relativ früeh het zämätrummlet zum Ysinge, letschti Tipps nomou z'sägä und üs -oder ömu e Teu vo üs- beruhigendi Wort z'übermittle. Gnützt hets u mir si am vieri vou Motivation i Adlersaal yglüffe u är het üses Lied ahgstumme. Jede Jodler u jedi Jodlerin isch vou konzentriert gsi, het d'Wort vom Stefan im Hingerchopf gha und dä Uftritt sogar chönne gniesse. Zämä hei mir eis Ziel gha, Bärglerfründe so schön dases üs müglech isch de Zuehörer überezbringe. Zfride mit üser Leischtig si mir ahschliessend es chüehus Bierli goh nä, wo üs dr Dominik gspändet het zum Abschluss vo sine Prüefige-danke Dominik. S'Wätter hets nid geng guet gmeint mit de Feschtbsuecher am Samschti, geng wieder hets e Schütti gäh-aber mir si jo hert im näh u hei in strömendem Rägä es Jützi unger de Schirme zum Beschte gäh u zämä es überus gmüetlechs Fescht erläbt. Ächt Äntlibuech hets verschtange üs Jodler u Bsuecher es wunderbars Fescht z'biete, miteme zfridnige u gsellige Ambiente.
Jo glohnt hei sech ou üsi Ahsträngige u die unermüedleche Närve vom Stefan- hei mir doch am sunnige Sunnti es 1 für üses Lied Bärglerfründe dörfe i Empfang näh. Mir hei e unbeschriblechi Fröid dranne u si ou stouz dases wiedereinisch glängt het. Danke Stefan, du bisch unersetzlech!